Sa de 59 editzionis de sa Fiera de s’Artesania artìstica de sa Sardìnnia

Ocannu puru, mancai a pustis de dudas e arrexonus po su Covid-19, sa bidda de Mòguru est cuncordendi sa de 59 editzionis de sa Fiera de s’Artesania artìstica, sa prus de importu de custu setori in totu sa Sardìnnia. Su tema de custa editzioni, chi assegurant at a arrespetai is normas anti-Covid po sa seguresa e sa saludi de is bisitadoris, dd’arrapresentat una ventana aberta faci a s’artesania. Duncas de su 8 de austu a su 6 de cabudanni at a fai a intrai ancora una borta in custu mundu chi de prus de cincuanta annus circat de contai totu cantu si cuat a palas de custas fainas spantosas chi de s’antigòriu funt lòmpias fintzas a nosu cun una sabidoria chi no tenit tempus.

Ocannu puru is istimadoris ant a podi ammirai sa bellesa de is traballus fatus a manu sighendi sa traditzioni prus antiga: maistus de tessìngiu, de linna, de pannu e de prendas ant a essi is protagonistas e ant a ponni in ammosta is faimentus insoru, arresurtaus nodius de una manera de si passai custas artis de babbu a fillu e de mamma a filla. Mancai siant mudaus is tempus, is modas, is costumàntzias, is relatas, custas artis arrennèsciint a bivi e a contai ancora su pòpulu chi seus. Su pintai, su tèssiri e s’intèssiri, s’impalliai, su cosiri, s’intalliai funt ancora parti de sa vida de is sardus, no sceti ca contant su chi seus stètius in passau ma ca contant comenti seus mudendi impari a sa sotziedadi chena de si ndi scaresci de custu passau e traballendi po mantenni biatzas custas traditzionis ùnicas. Sa primu editzioni de sa Fiera dd’iant apariciada in su 1961 candu unus cantu de fèminas e maistus de linna, cun s’agiudu de su sìndigu Efisio Lippi Serra e de s’amministratzioni comunali de insaras, iant incingiau un’ammosta de tapetus insoru, torrendi a bogai a pillu manixus allogaus po tempus meda me is cadàscius e ammostendi a sa genti su sentidu prus fungudu de sa traditzioni berdadera.

In is primus annus dda faiant in su mesi de maju, me is diis de sa festa de Santu Bernardinu, pàtronu de sa bidda. ma bellu a bellu, po dda tenni aberta de prus e fintzas po arreciri is stràngius chi benint in fèrias, ant sceberau de dda cuncordai in istadi. Cun su tempus ant amanniau puru is aposentus innui dda cuncordai, fintzas a fraigai unu Tzentru Polifuntzionali fatu a posta po s’ammosta e po giai logu e visibilidadi prus mannus a is òberas, sendi chi ant detzìdiu de aberri is jennas a totu is artistas isulanus, in prus de is mogoresus, cumbidendi-ddus a ddoi pigai parti e faendi aici de Mòguru unu logu connotu e famau in totu su mundu pròpiu po s’artesania sarda.

Manuela Ennas

Diventa anche tu sostenitore di SardiniaPost.it

Care lettrici e cari lettori,
Sardinia Post è sempre stato un giornale gratuito. E lo sarà anche in futuro. Non smetteremo di raccontare quello che gli altri non dicono e non scrivono. E lo faremo sempre sette giorni su sette, nella maniera più accurata possibile. Oggi più che mai il vostro supporto è prezioso per garantire un giornalismo di qualità, di inchiesta e di denuncia. Un giornalismo libero da censure.

Per ricevere gli aggiornamenti di Sardiniapost nella tua casella di posta inserisci la tua e-mail nel box qui sotto:

Related Posts
Total
0
Share