Sa cura de su dolore. Una frontera noa pro is malàidos

“Divinum est opus sedare dolorem”. Giai Ippocrate naraiat chi “est divinu totu su chi serbit pro allebiare su dolore”.
Cando faeddamus de maladias, ischimus chi su dolore, pruschetotu a cumintzu, tocat tentu in contu pro lòmpere a una diagnosi. Ma si, a pustis de àere averiguadu totu, non si lompet a resurtados chi faghet a pretziare e su dolore portat un’agravamentu a is cunditziones de salude de su malàidu, tocat cunsideradu de parte sua una maladia e aici tocat tratadu. Su dolore rapresentat su mèdiu de s’organismu nostru pro signalare unu disacatu. Incapitat a bias chi acabet de cumprire custa funtzione sua divenende issu etotu maladia, in cantu su persìstere suo dipendet de s’aparatu nostru chi funtzionat male. Cando est aici a su dolore ddi naramus “crònicu” non pro su tempus de persistèntzia ma pro sa mudada de s’organizatzione anàtomo-fisiològica de su sistema nerviosu de sa persona chi nd’est malàida. Su dolore benit a èssere un’ala de su bìvere fitianu divenende un’esperièntzia negativa e fintzas invalidante.

S’Istadu italianu cun sa Lege n. 38 de su 15 martzu 2010 reconnoschet su dolore comente a maladia e règulat is disponimentos pro garantire s’atzessu a is curas palliativas e a sa cura de su dolore, pro assigurare, in s’àmbitu de is livellos essentziales de assistèntzia, curas adecuadas in ogni fase de sa maladia, e pro donare un’amparu sanitàriu e sòtziu-assistentziale a sa persona malàida e a sa famìlia.

Ma nc’at ancora reghedia meda rispetu a sa cura de su dolore, a s’ispissu dèpida a una resistèntzia culturale o religiosa. In prus si pensat chi su dolore siat pruschetotu de tipu oncològicu e imbetzes sceti su 2% nde sunfrit. De dolore crònicu benignu nde sunfrit agiumai su 26% de is italianos.

In Sardigna, in s’ispidale Binaghi de Casteddu, ddoe at un’ambulatòriu pro sa cura de su dolore. Ddu ghiat Tomaso Cocco, dotori chi dae una bella pariga de annos at seberadu de s’ocupare de sa cura de su dolore. A pustis de s’ispetzializatzione in Anestesiologia e Rianimatzione in s’Universidade de Tàtari e master in Cura de su dolore in s’Universidade de Parma, at pòdidu pònnere a frutu is istùdios suos in s’Istitutu Europeu Oncològicu e posca in s’Istitutu Humanitas de Milanu. A pustis de àere traballadu in Friuli, in s’ispidale tzivile de Pordenone, est torradu in Sardigna in su martzu de su 2013, e in su Binaghi de Casteddu, gràtzias a s’aficu de su diretore sanitàriu Teresa Orano e de su primàriu Frantziscu Licheri, at fundadu s’ambulatòriu de Cura de su Dolore. In su 2015 at abertu puru su tzentru pro sa cura de su dolore de conca e at incarreradu sa protzedura pro impreare sa cannabis terapèutica. Prus de 200 malàidos dda pigant cun resurtados bonos.

Sa faina de s’ambulatòriu creschet de annu in annu e a oe prus de 4000 malàidos si faghent curare pro su dolore. A s’ambulatòriu si lompet tzerriende a su Cup. S’ispera est chi un’informatzione prus manna subra de sa cura de su dolore potzat ammanniare s’aficu in is cunfrontos de custa discilplina pro su bene de is malàidos.

Manuela Ennas

Diventa anche tu sostenitore di SardiniaPost.it

Care lettrici e cari lettori,
Sardinia Post è sempre stato un giornale gratuito. E lo sarà anche in futuro. Non smetteremo di raccontare quello che gli altri non dicono e non scrivono. E lo faremo sempre sette giorni su sette, nella maniera più accurata possibile. Oggi più che mai il vostro supporto è prezioso per garantire un giornalismo di qualità, di inchiesta e di denuncia. Un giornalismo libero da censure.

Per ricevere gli aggiornamenti di Sardiniapost nella tua casella di posta inserisci la tua e-mail nel box qui sotto:

Related Posts
Total
0
Share