Sa cultura no si firmat. Asumancu custa est sa tarea de su ministèriu po is Benis, is Atividadis Culturalis e su Turismu chi in custu tempus de emergèntzia po su Coronavirus, at abertu una pàgina noa in su giassu internet po ponni impari totu is atòbius virtualis chi pertocant is acontessimentus apariciaus de is logus de sa cultura statali, de su mundu de su spetàculu, de sa mùsica e de su tzìnema. De sa pàgina fait a intrai in ses setzionis diferentis arricas de materialis: mùsica, tzìnema, museus, lìburus, teatru, educatzioni e abarrai aici in cuntatu cun s’arti e sa cultura de dònnia regioni, in su mentris de custu disacatu.
Pruschetotu funt is museus is chi faint sa majoria de fainas, ammostendi is colletzionis chi ddoi tenint, contendi naìbbulus a pitzus de is artistas e de is òberas insoru e ghiendi is bisitadoris aìnturu de su museu in manera virtuali cun s’impreu de sa tecnologia. Po liai parti a cantu cuncordat su Mibact tocat a sighiri s’hashtag #iorestoacasa o is pàginas in is retzas sotzialis @mibact, @museitaliani e de is àterus logus famaus de sa cultura. De su 3 de aprili fintzas su Museu Archeològicu de Casteddu est aìnturu de custa retza de museus virtualis e fait duncas a ddu bisitai a s’indonu, abarrendi in domu, imbuchendi-ddoi de su giassu internet e movendi-sì me is cuàturu pianus, in mesu a sa bellesa de 4000 repertus archeològicus.
Is bisitadoris aici ant a podi intrai in sa stòria de sa Sardìnnia, cumentzendi de su perìodu Neolìticu, sighendi in s’època nuràgica, su perìodu fenitzu-pùnicu, su perìodu romanu, is orìginis de su cristianèsimu fintzas a lompi a s’annu Milli. De importu funt is setzionis dedicadas, comenti sa chi pertocat su santuàriu nuràgicu de Santa Vitòria de Serri, su Nuraxi de Barùmini, sa zona de Tuvixeddu, sa tzitadi de Nora, e fintzas is Gigantis de Monti Prama. Custu progetu est nàsciu de sa collaboratzioni de sa diretzioni de su museu cun s’Universidadi de Pàdua e sa sotziedadi Teravista po sa parti tènnica. Duncas ocannu, po custa Pasca de s’Àngelu, sendi chi no fait a bessiri po nexi de su Covid-19, su consillu est su de sighiri custu ligàmini – www.teravista.it/museo_archeologico_cagliari/ – e gosai asumancu aici de sa stòria nosta, abetendi unu tempus mellus po ddoi podi andai diaderus.
Manuela Ennas
