Po immoi funt otu is assòtzius chi ant cuncordau sa Carta de Montarbu cun sa tarea de ndi pesai unu movimentu linguìsticu inclusivu, capassu de acolliri cantu prus assòtzius e personas chi tengant a coru su benidori de sa lìngua sarda. Unu movimentu chi ammostit cun fainas e un’impreu fitianu chi su sardu tocat a ddu fueddai, a ddu studiai e ddu fai brintai in dònnia setori de sa sotziedadi.
In totu Europa funt medas is minorias chi batallant po sa lìngua insoru aparicendi progetus e atzionis po assegurai su deretu de fueddai sa lìngua de su logu e dd’amparai de s’arriscu chi si sperdat cun su tempus. In Sardìnnia puru, segundu is assòtzius chi ant liau parti a s’aprontu de su documentu, nc’at genti meda chi si bolit ponni impari e donai vida a unu progetu chi scìpiat torrai valori e dinnidai a sa lìngua nosta.
Is primus assòtzius chi ant pigau parti a sa faina funt su Babel Film Fèstival, chi fait giai parti de Elen, s’assòtziu europeu prus de importu in contu de custa chistioni, Bia – Bilinguismu in Aristanis, Campos – Assòtziu Coordinamentu de is Artis Musicalis e Poèticas de Traditzioni Orali de sa Sardìnnia, sa Consulta de su sardu de Sàrdara, Lìngua Bia, Movidì, Sardware, Acadèmia de sardu.
“Sa tarea de sa Carta de Montarbu –comenti narat una nota de is organizadoris– est de una parti a arreconnosci in sa militàntzia individuali, personali e polìtica po su sardu, sa mellus manera po ponni in pratiga cussu amori po sa lìngua sarda chi in medas espressant a fueddus sceti. Invècias, de s’àtera parti, est de ndi pesai unu sentidu crìticu capassu perou de realizai su chi seus preguntendi po sarvai sa lìngua”.
“Cumbidaus – aici sighit sa nota – totu is sardas e totu is sardus e totu is assòtzius, a s’uniri cun nosu ca su progetu est abertu e tenit gana de s’ammanniai cun s’agiudu e sa cumpartzidura de chi bolit fai custa caminera noa”. Tocat a scriri a infonlinguabia@gmail.com po ndi sciri de prus, po donai unu manu de agiudu e po si ddoi marcai.
Manuela Ennas
