Sa Candelera, una festa cristiana cun arrèxinis paganas

Su 2 de friàrgiu sa crèsia catòlica arregordat sa presentada de Gesùs a su Tèmpiu. In custa dì, in su mentris de is tzlebratzionis litùrgicas si benedixint is candelas, sìmbulu de Gesugristu chi, comenti a una luxi, illùminat sa menti de s’òmini po dd’inditai su camminu. In sa matessi dì sa crèsia tzèlebrat puru sa Purificatzioni de sa Vìrgini Maria, sendi chi po i Leis de Mosè e duncas po su pòpulu ebràicu, is fèminas chi iant donau a sa luxi unu pipiu no teniant prus sa puresa e duncas depiant abetai coranta diis po bessiri de domu de sa dì de sa leva e po s’ incresiai, est a nai a torrai a intrai in su Tèmpiu po si purificai. No po nudda funt coranta is diis chi passant de su 25 de mesi de idas, sa dì chi po su Cristianèsimu est nàsciu Gesugristu, a su 2 de friàrgiu.

Fintzas a pagus annus a oi su Cristianèsimu at tentu custa arrègula e is fèminas ant sighiu a s’incresiai passadas is coranta diis de sa leva e, po su prus, sa dì de su batiari de is pipius is mammas ammancànt in crèsia pròpiu po custa arrexoni. Custa usàntzia dda sighiant meda in Sardìnnia puru fintzas a pagu tempus. Su nòmini de Candelera, comenti contat sa scritora arromana Egeria in s’òbera “Perigrinatio”, ndi benit de sa simbillantza cun una festa pagana prus antiga, su ritu de su Lucernàriu, una prucessioni cun flàculas allutas chi faiant a metadi de friàrgiu, sighendi una traditzioni arromana ancora prus antiga, sa de is Lupercalis. Custas duas festas, sa Candelera cristiana e is Lupercalis tenint in comunu s’impreu de is candelas e pruschetotu s’idei de sa purificatzioni po smarigai in calchi manera is curpas.

Parit chi siat stètiu Papa Gelàsiu (492-496) a pediri e otenni de su Senau de ndi bogai sa festa de is Lupercalis po cumentzai a festai in logu suu sa Candelera. A cumentzu sa Candelera acustumànt a dda tzelebrai perou su 14 de friàrgiu, coranta diis apustis de sa dì de sa Pasca de is tres urreis, su 6 de gennàrgiu. Est stètiu s’imperadori Giustinianu a dda bolli festai innantis, sceberendi su 2 de friàrgiu. Sa dì infatu, su 3, sa crèsia festat a Santu Biasu, arrapresentau sèmpiri cun is candelas in is pinturas e in is stàtuas: in custa dì si benedixit su gùturu cun is candelas beneditas sa dì innantis ca nant chi funt miraculosas po dd’amparai de is maladias. Nci funt àteras festas puru acapiadas a su cultu de sa luxi comenti sa de traditzioni cèltica, Imbolc, chi marcàt su transiri de su scuriu de s’ierru a sa luxi de su beranu .

Manuela Ennas

Atividade realizada cun su contributu de sa Regione Sardigna – IMPRENTAS 2020-2021.
LR 22/2018, art. 22
Attività realizzata col contributo della Regione Sardegna – IMPRENTAS 2020-2021.
LR 22/2018, art. 22

Diventa anche tu sostenitore di SardiniaPost.it

Care lettrici e cari lettori,
Sardinia Post è sempre stato un giornale gratuito. E lo sarà anche in futuro. Non smetteremo di raccontare quello che gli altri non dicono e non scrivono. E lo faremo sempre sette giorni su sette, nella maniera più accurata possibile. Oggi più che mai il vostro supporto è prezioso per garantire un giornalismo di qualità, di inchiesta e di denuncia. Un giornalismo libero da censure.

Per ricevere gli aggiornamenti di Sardiniapost nella tua casella di posta inserisci la tua e-mail nel box qui sotto:

Related Posts
Total
0
Share