In su 1970, cincuanta annus fait, su Casteddu at bintu su Campionau de fùbalu de sèrie A. Un’acadessimentu chi ancora oi fait tenni prexu a su coru de is sardus e chi est acapiadu po sèmpiri a unu nòmini, su de Gigi Riva, giogadori famau chi at ghiau sa truma in custa faina stòrica. Pròpiu a Gigi Riva, Davide Piras, scritori de Terraba chi at giai tentu arresurtaus de importu cun is lìburus suus, at dedicau s’ùrtimu traballu, bessiu in custas diis e imprentau de Condaghes.
Sa chi sceberat Davide Piras est una forma narràtiva chi ponit impari romanzu e biografia po si contai de un’òmini, de unu giogadori, de s’amori po unu sport e una scuadra, de sa stima de su pòpulu sardu chi ddu sighit a cunsiderai un’eroi e unu sìmbulu. Sa stòria cumentzat in su 1949: Gigi est unu pipieddu de cincu annus chi passat is diis tirendi sticadas de pei a botixeddus. Tenit giai su disìgiu, o sa spera, de essi unu campioni. Is amigus suus si spàssiant gioghendi a s’acabussai in su lagu e invècias issu pensat sceti a curri in su campu de giogu de s’oratòriu e a nci fai imbucai sa bòcia in sa jenna. Est sèmpiri scrutzu ca is crapitas costant caras, ndi tenit sceti una pariga e no fait a ndi torrai a pigai meda meda. Gràtzias a su babbu, Ugo, chi amat su sport cantu su fillu, Gigi arrennèsciit a intrai in una scuadra, mancai pitica, de fùbalu ufitziali e in pagu tempus ndi bessit a pillu s’abilesa sua e nemus est capassu de ddu firmai. Sa famìlia Riva est cuntenta de cussus arresurtaus, mancai bivat in povertadi a pustis de sa gherra. Ma incapitat unu degòlliu mannu chi truncat s’àndala de is esistèntzias insoru: Ugo si morit in su traballu, po nexi de un’incidenti. E aici cumintzat sa batalla de Gigi: de piciocheddu malassortau chi s’intendiat a bellu a bellu si ndi torrat a strantaxai po mori de su fùbalu, e sa bonasorti ddi fait binci totu is patimentus chi iat passau, finsas a diventai “Rombo di Tuono”, allomìngiu chi dd’at a abarrai po totu sa vida.
Una carriera difìtzili, fata de dolori e sacrifìtzius, de diis nodidas de arregordai e diis lègias de scaresci, de un’amori mannu po su Casteddu e po totu sa Sardigna. Sa carriera sua a dolu mannu si firmat in su 1976 in una domìniga de friàrgiu, a pustis de un’atumbada cun su giogadori de su Milan Bet, candu Gigi Riva nc’arruit malamenti a terra e s’ingollit. In su stàdiu de Sant’Elia calat su mudori ca sa ferta est drammàtica e no lassat dudas. Candu su giogadori bessit de su campu de giogu agiudau de is cumpàngius, totu sa Sardìnnia cumprendit chi est acabendi un’època. Is tifosus si ndi pesant e ddu saludant cun unu tzacamanu chena de acabbu. Gigi Riva, ancora giòvanu, si ndi depit andai po sèmpiri de cussu campu, cun sa màllia sua arrùbia e bleu e su nùmeru 11. Ma sa stòria sua sighit a bivi e Gigi Riva, chi at portau in artu su Casteddu donendi onori e dinnidadi a totu s’ìsula, abarrat unu de cussus atletas chi at atenni sèmpiri calincuna cosa de imparai a is generatzionis noas. Cun su lìburu de Davide Piras fait a gosai de sa letzioni de vida chi Rombo di Tuono s’at donau.
Manuela Ennas
