Cumentzat su 15 de maju in Sardìnnia su progetu “Plastic free-Liberiamo il mondo dalla plastica“. Est su comunu de Marrùbiu su primu a incarrerai sa faina. S’atòbiu, in logu de Morte Arci, po chini bolit pigai parti, est po is noi oras e mesu de mangianu ananti de sa cresiedda de sa Madonna de Zuradili. Su progetu nascit de una pensada de Flowe, un’assòtziu ONLUS, est a nai chi no traballat po guadangiai, chi cuncordat e ghiat fainas po amparai s’ambienti e ddu limpiai de totu cantu ddu imbrutat e impestat. Cun su traballu insoru, in totu su territòriu natzionali, ant giai bodditu prus de 150 milla tonnelladas de arrefudus.
Sa tarea de Flowe est cussa de fai connosci a sa genti su dannu chi portat s’impreu de sa pràstica in s’ambienti innui biveus: S’assòtziu aparìciat puru fainas po limpiai is logus assodendi dònnia arratza de àliga chi impestat sa terra e su mari, àliga chi portat un’impeoramentu in sa vida de s’òmini e, de is animalis e de totu su mundu naturali. In Sardìnnia, a s’initziativa de Marrùbiu, nd’ant a sighiri un’àtera bella pariga. Difatis sa dì a pustis, su 16 de maju, sa faina fata in su Monte Arci dd’ant torrai a arrepiti in logus meda de Sardìnnia: un’atòbiu in Aristanis, in s’arenarxu de Turri Manna, cumentzendi a is dexi de mangianu; un’àteru dd’ant a fai in Terranoa a is noi oras de mangianu; unu in s’arenarxu de su Poetu de Casteddu a is dexi, in S’Alighera inghitzendi a is dexi e mesu; un’àteru atòbiu in Casteddu Sardu movendi de su portu turìsticu a is noi oras e mesu; in sa bidda de Lunamatròna a is noi oras, in sa bidda de Murèra a is dexi, in sa bidda de Òsile sèmpiri a is dexi, in sa plaja de Is Benas in Santeru a is noi oras e mesu, in Sòssu a is noi oras e mesu sèmpiri de mangianu. Ant invècias annuddau s’atòbiu chi fiat in progràmma a Marceddì Totu custas comunidadis duncas ant a dedicai custa giornada a ndi assodiri sa pràstica e a cumpartziri unu sentidu de sustenibilidadi po cantu pertocat s’arrispetu de s’ambienti.
Manuela Ennas