“Arregallu de Paschixedda” est s’initziativa de su Tzentru “San Francesco” de Casteddu, pensada po donai una manu de agiudu a is personas solas, o chi s’intendint solas, chi in custus tempus de festa dePaschixedda abbisòngiant de un’amparu, de unu fueddu, de unu consillu, de incoragiamentu po allebiai sa soledadi insoru. In su Tzentru “San Francesco” ddoi traballat una truma de psicòlogus e psicoterapeutas espertus: Francesca Pineider, Laura Altobelli, Patrizia Piras, Chiara Grasso, Nicola Contu, Davide Bisceglie e su psichiatra Carlo Arzedi. Sa tarea de custa faina est sa de oferri agiudu a chi est intrau in tempus, a chi no baliat dificurtadis, a personas cun una carchi debilesa e mescamenti solas, passendi unu pagu de su tempus cun issus a su telèfonu me is diis de Paschixedda e fintzas in custu perìodu de serrada po su Coronavirus chi a dolu mannu ammànniat àterus problemas puru.
Ca no nc’at arregallu prus mannu e nodiu de unu pagu de consolu po allebiai sa soledadi candu ammancant sa saludi o s’afetu de sa famìllia, o po parai fronti a sa timoria po cantu est acontessendi, po lassai a una banda is tormentus e agatai assèliu. A bortas bastat pagu, su chi donniunu de nosu podit oferri, po spainai sentidus bonus in su mundu e donai vida a unu tzìrculu virtudosu.
Sa truma de psicoterapeutas dda ghiat sa dotora Giannina Casti, psichiatra e psicoterapeuta, chi at giai traballau in sa matessi àndala in beranu, in su mentris de sa primu fasi de s’epidèmia. Immoi est torra a disponimentu e po pigai acordus fait a ddus mutiri a su nùmeru de telèfonu 3480618552. Difatis est giai possìbili a pediri un’apuntamentu telefònicu po nci passai calchi orixedda in cumpangia sa dì de Paschixedda, mancai in manera virtuali, cun sa spera chi assumancu calincunu si potzat intendi pagu pagu mellus ca is diis de festa funt malas a nci passai candu unu est a solu, candu sunfrit e s’intendit abbandonau de totus.
Manuela Ennas
