Organizada de s’assòtziu culturali ‘Onlus Imago Mundi’, paris cun su Comunu de Casteddu, sa Regione Autònoma de Sardìnnia e s’agiudu de unus cantus privaus, Monumenti Aperti dònnia annu si proponit de aberri cussus logus chi est difìtzili a bisitai e chi faint parti de su patrimòniu stòricu e artìsticu de sa Sardìnnia, po ddus torrai a su pùblicu cun contus e aprofundimentus. Nàscia in su 1997 gràtzias a sa pensada de una truma de universitàrius amantiosus de sa stòria e de s’arti, sa manifestatzioni est crèscia aici meda fintzas a a essi unu de is prus atòbius culturalis de importu in totu s’ìsula. A custa initziativa me is annus ant donau s’atentu insoru personàgius famaus de su panorama culturali ma pruschetotu is voluntàrius e is studiantis de is scolas sardas, de dònnia òrdini e gradu, chi dònnia annu faint a gara po liai parti a custa festa manna de sa cultura, adotendi unu monumentu e faendi is ghias turìsticas assumancu po un’acabbu de cida.
In prus de is bìsitas a is monumentus sa manifestatzioni prevedit unu programma sèmpiri prus arricu de atòbius literàrius, laboràtorius po is pipius, mamentus musicalis, propostas de mandiari acapiadas a su territòriu e produtzionis de teatru, po interessai de prus is bisitadoris oferrendi possibilidadis de sceberu. Perou ocannu, po custa chi est sa de binticuàturu editzionis, po nexi de su Covid e de totu is lìmitis chi imponit, is organizadoris ant torrau a pensai sa manera de dd’apariciai e ant sceberau sa tecnologia digiatali comenti mèdiu po podi lompi a totus e donai unu sinniali de importu mancai su clima de emergèntzia sanitària chi seus bivendi.
Gràtzias a sa disponibilidadi e sa voluntadi de medas scolas, assòtzius e istitutzionis formativas de sa Sardìnnia, de s’Emìlia, de sa Lombardia e de sa Pùglia, arrispetendi is arrègulas in vigori, Imago Mundi no at bòfiu arrenuntziai nemmancu ocannu a cuncordai custa faina de valorizatzioni e promotzioni de su patrimoniu culturali materiali e immateriali. Custa editzioni 2020, a caràteri natzionali, s’at a acumpriri in is diis de sàbadu 5 e domìniga 6 de mesi de Idas arrespundendi a sa crònaca pandemica cun sa fortza de una cultura chi siat anticorpus de bellesa. Bintises istitutus scolàsticus, binticincu assòtzius, universidadis, amministratzionis cumonalis: po sa primu borta in is binticuàturu annus, totu is localidadis ant a liai parti, donendi su contributu insoru a sa manifestatzioni, in modalidadi digitali sceti po mèdiu de una direta streaming chi at a cumentzai sàbadu 5 a is cuàturu de meigama e at a sighiri domìniga 6 a is ùndixi de mangianu in su giassu internet e in is canalis social de Monumenti Aperti. Custa iat a podi essi fintzas un’opurtunidadii po fai cresci sa manifestatzioni portendi-ddoi aìnturu sperimentatzioni e innovatzioni, e ammanniendi su sentidu collètivu de su progetu. Po chini bollit prus informatzionis auba de sa manifestatzioni fait a sighiri su ligàmini www.monumentiaperti.com.
Manuela Ennas