Est lòmpia in custas diis sa nova ufitziali po cantu pertocat sa protzedura chi at a permiti de achiriri is terrenus a ingìriu de s’àrea archeològica de Mont’e Prama, in zona de Crabas. Sa Diretzioni generali de su ministeru difatis at incarrerau su protzedimentu po sa dichiaratzioni de “pùbrica utilidadi”, unu documentu chi tocat a fai prima de cumentzai su spossessu de is terrenus chi, luegu e totu, ant a essi logu po campagnas noas de scavu archeològicu.
Custa primu fasi, obligatòria po su Còdixi de is benis culturalis e de su paesàgiu, connotu cun su nòmini de Còdixi Urbani, at a permiti de abiai sa fasi de spossessu. Sa comunicatzioni dd’at donada su sìndigu Andrea Abis narendi chi ant a pubricai is documentus me is sessanta diis imbenientis.
Invècias aìnturu de is 30 diis chi sighint su Ministeru at a pregonai su Decretu de pùbrica utilidadi. “Est unu primu tretu de importu” – at naradu su sìndigu Abis – “A pustis de duus annus de traballus, finalmenti inghitzat, po sa parti amministrativa, unu progetu de svilupu mannu de su situ archeològicu. S’àrea noa de is spossessus est larga meda, assumancu una dexina de ètarus, e dd’eus pensada e bòfia po donai una prospetiva longa a is traballus chi andint aici meda prus a innantis de is scavus presentis immoi”.
“Su progetu de s’amministratzioni — at sìghiu su primu tzitadinu — est su de donare a s’àrea totu s’importu chi ddi minescit a manera chi Mont’e Prama potzat essi, de immoi a dexi annus, unu tzentru de primori po is stùdius stòricu-archeològicus, po is atividadis de circa de is Universidadis de su mundu, po su svilupu de su turismu culturali in Sardìnnia. De su scusòrgiu allogau asuta de su Sinis nd’ant agatau una parti sceti, e nc’at ancora meda de cumprendi e de scoberri asuba de sa stòria nosta”.
Sa scoberta de is Gigantis est una de is prus mannas in is ùrtimus annus po cantu pertocat su Mediterràneu. Custa noa lassat spera po su benidori de Mont’e Prama chi at a aberri is jennas de su situ archeològicu a totus, a is circas scientìficas e a is manifestatzionis culturalis, portendi profetu a totu sa zona e a sa Sardìnnia intrea.
Manuela Ennas
