Su 21 de mesi de Idas, in is locales de su Palatzu de Tzitade, si sunt abertas is ghennas de sa mustra ‘Leonardo invenit. Su gèniu intre arte e sièntzi’, a incuru de Efisio Carbone e Tiziana Ciocca. Sa mustra cheret tzelebrare a Leonardo da Vinci chi est istadu un’artista, un’iscientziadu, un’architetu e un’imbentore pretziadu giai a is tempos suos e chi oe puru, a chimbighentos annos dae sa morte, sighit a èssere unu de is prus mannos de su mundu de s’arte.
Sa mustra, chi at a abarrare aberta finas a su 23 de freàrgiu, est partzida in tres setziones e pertocat is duos aspetos prus famados de s’arte sua, cussu artìsticu e cussu iscientìficu, Sa primu setzione est dedicada a su volùmene ‘Collection des Têtes’ de Andrè Dutertre, publicadu in su 1808 e chèrfidu dae Napoleone, cun is 14 tàulas de s’Ùrtima Chena, is retratus de Leonardo, de Gesùs e de is dòighi Apòstolos. In sa segunda setzione imbetzes faghet a ammirare s’espositzione de 23 mollos de is màchinas fabricadas dae Leonardo, chi nde benint dae su Museu Leonardo da Vinci de Firenze e chi faghent parte de sa Colletzione de sa Famìlia Niccolai.
Sa de tres setziones pertocat s’esperièntzia artìstica sarda de su Rinaschimentu. In prus de custas tres ddoet at una setzione dedicada a sa didàtica museale. Afortiende sa collaboratzione cun su Comunu de Casteddu e is Museos Tzìvicos e cun sa tarea de avalorare s’istòria de s’arte de su Chimbighentos sardu, a sa mustra leat parte fintzas s’Universidade de Casteddu: difatis in su Palatzu de Tzitade ant a èssere espostas duas òberas nodidas de sa Colletzione Piloni, est a nàrrere una pintura de Antioco Mainas e una pintura de sa Butega de is Cavaro, chi apartenent a s’Iscola de Stampaxi. A sa mustra faghet a ddoe andare ogni die, francu su lunis, dae is deghe de mangianu fintzas a is ses de merie.
Manuela Ennas
