Is Giogus Olìmpicus modernus nascint in su 1896, bòfius de su baroni frantzesu Pierre de Coubertin. S’idea sua fiat de fai, in is tempus modernus, is giogus sportivus de sa Grècia antiga cun sa matessi filosofia. Dònnia cuàturu annus su sport iat a ai dèpiu arremudai totu is àteras maneras de arresolvi is problemas intra de is pòpulus de su mundu. Sa cosa perou, a pustis, est andada in manera diferenti. Ca a fai citì e firmai is armas no est cosa fàtzili fàtzili.
Sa cosa de importu est a liai parti, no a binci.
A totus praxit pensai a fèminas e òminis chi giogant po si spassiai, e chi no bincint passièntzia. Ma sa passièntzia no est cosa fàtzili de agatai in is personas. Ca binci est sa cosa prus de importu, a sa faci de De Coubertin. Una bìncida podit mudai una vida. E insaras, chi serbit calincuna cosa po agiudai, mancai una mexina, poita no dda pigai? E nosu, sciadaus, a si spantai…
Su sport est una cosa, sa polìtica un’àtera.
Apariciai is Giogus Olimpicus no est cosa de dònnia dì. Serbit dinari meda, nci funt de fraigai is struturas po is disciplinas diferentis, nc’est de pensai a comenti acolli is atletas e is spetadoris. Is Giogus bolint nai unu muntoni de dinai de spendi. Chi fait su tziri-tziri. Is prus de is bortas su dinai chi si spendit est meda de prus de cussu chi si fiat postu in contu. Ma tanti chi spendit no est agiumai su chi pagat. Po nai, is giogus de su 2004 funt stètius salius meda po sa Grècia, ca de insaras est cumentzada sa crisi econòmica chi dda posta in genugu.
Po praxeri sport, no fùbalu sceti.
Chi no si firmat sa gherra, asumancu dònnia cuàturu annus parit chi si firmit su fùbalu. Po unu mesi sa televisioni e is giornalis e is retzas sotzialis puru chistionant de is àterus sport. Sa sèrie A, sa Champion e totu cussu chi pertocat su palloni parit scarèsciu o assentau a una parti. Sa genti diventat totinduna esperta de judo, de ginnàstica, de nadru. Ma su palloni est inguni, lestru a torrai a bessiri a pillu, candu si serrant is giogus.
Manuela Ennas
