Is farras de baballoti ant a essi su màndigu de su benidori, asumancu po s’Unioni Europea.

De s’acabbu de gennàrgiu passau in totu s’Unioni Europea fait a papai màndigu fatu cun farra de ungrullus, po mori de su Regulamentu 2023/5. Is ungrullus funt is de tres baballotis chi po s’Ue fait a impreai me in sa cosa de papai. Is àterus, giai permìtius me is annus passaus, funt is tingiolus e is pibitziris. Est de su 2018 chi s’Ue at cumentzau a sduanai is baballotis comenti cosa de papai e a pagu a pagu est aciungendi variedadis noas a cussas giai permìtias. Is farras de custa genia ddas faint mollendi baballotis sicaus: sa tarea de s’Unioni Europea est cussa de ddas impreai po arrexonis de amparu de s’ambienti e de saludi.

Po produsi is farras de baballotis serbit prus pagu àcua e prus pagu terra cunfronta a is cantidadis chi serbint po produsi is farras de su connotu. Custu acuntessit poita po is baballotis est prus fàcili de is àterus animalis a mudai in carena su chi papant: po ammanniai sa matessi cantidadi de proteinas, is baballotis impreant prus pagu risorsas de su bestiàmini. In prus, pesai is baballotis produsit prus pagu bogaduras de gasu serra cunfronta a su bestiàmini e s’àliga chi faint est bona a manixai comenti ladàmini po is matas. Aciungeus puru chi po cresci is baballotis s’impreat pagu energia elètrica, ca fait a ddus pesai in barraconis puru.

In contu de saludi, sa primu cosa de marcai est chi casi su 70% de is farras de baballotis est fata de proteinas, contra a casi su 15% de cussas de lori. In prus, me is baballotis ddoi funt cantidadis mannas de elementus utilosus comenti vitaminas e mineralis. Àteras cosas profetosas funt chi custas farras noas fait a ddas digiri prus a lestru de is àteras e chi no faint dannu a is celìacus. A s’acabbu, is spertus funt de acòrdiu a nai chi is farras de baballotis funt prus sustentadoras de is farras de lori.

In contu de impreu fait a ddas impitai po fai su pani, is gressinus, is pistocus, sa pasta, fintzas is bànnias, sa birra, su ciuculati e su gelau. Tocat a nai puru chi, sigumenti no tenint sabori, est fàcili a ddas amesturai cun is àterus ingredientis. Cun totu chi po s’UE is farras de baballoti siant profetosas e potzant essi su màndigu de su benidori, a sa prus parti de sa genti, asumancu in Itàlia, a papai arnas, ungrullus e pibitziris no ddis iat a fai prexeri. Segundu una circa de Coldiretti, su 54% de is consumadoris italianus est contrària a s’impreu insoru poita pensat chi is baballotis no fetzant parti de sa cultura alimentari nosta, e ddus schivant puru. Chi su 6% de is intervistaus no sciit ita nai, sceti su 16% est a favori de ddus impreai me in sa cosa de papai. Un’àtera arrexoni contrària a custu màndigu nou, a parti su sentidu de sa genti, est acapiada a sa seguresa alimentari. Meda spertus difatis, mancai comenti idea arreconoscant su profetu de custus animalis, in pràtiga ddus timint poita fait a ddoi agatai lua e sustàntzias malas a segunda de is logus innui ddus ant pàscius.

Coldiretti aciungit a custas timorias is pensamentus in contu de amparu de traditzionis, produtus e cultura alimentari italiana e regionali, chi iant a perdi is piessignus insoru cun s’impreu de custus sustentus allenus. Su Guvernu, chi est promovendi in s’Onu su mandiari italianu po ddu fai arreconnosci indiritura comenti richesa de s’umanidadi, at ammostau luegu de essi impensamentau de custas novas chi benint de is leis europeas. Po custas arrexonis cida passada at fatu bessiri cuàturu decretus po arrègulai sa chistioni. Po su Ministru de sa Laurera Francesco Lollobrigida donniunu podit papai su chi pensat siat su mellus po sei, ma tocat a fai sciri a is consumadoris in manera crara su chi ddoi at aìnturu in su chi papant. Insandus is decretus òbrigant a scriri me is imboddicus,chi aìnturu de is produtus alimentaris ddoi at farra de baballotis e chi ndi ddoi at, custus produtus no fait a ddus ponni, me is butegas, impari a is àterus ma tocant postus in stantis aposta.


Massimiliano Meloni

Atividade realizada cun su contributu de sa Regione Sardigna – IMPRENTAS 2022-2023.
LR 22/2018, art. 22
Attività realizzata col contributo della Regione Sardegna – IMPRENTAS 2022-2023.
LR 22/2018, art. 22

Diventa anche tu sostenitore di SardiniaPost.it

Care lettrici e cari lettori,
Sardinia Post è sempre stato un giornale gratuito. E lo sarà anche in futuro. Non smetteremo di raccontare quello che gli altri non dicono e non scrivono. E lo faremo sempre sette giorni su sette, nella maniera più accurata possibile. Oggi più che mai il vostro supporto è prezioso per garantire un giornalismo di qualità, di inchiesta e di denuncia. Un giornalismo libero da censure.

Per ricevere gli aggiornamenti di Sardiniapost nella tua casella di posta inserisci la tua e-mail nel box qui sotto:

Related Posts
Total
0
Share