Po totu su mesi de Idas is Comunus de Aristanis, Arborea e Tzeddiani ant a arregallai a is famìllias de is pipius nàscius ocannu su lìburu ‘A fior di pelle’ de Chiara Carminati e Massimiliano Tappari (Editzionis Lapis), impari a unu opùsculu cun consillus po sa letura. S’initziativa, nàscia in s’àmbitu de su pianu natzionali Biblioraising 4 promòviu de su Centru po su Lìburu e sa Letura e de s’Anci, cun su coordinamentu de sa Scola de Fundraising de Roma, dd’ant incingiada in su mesi de argiolas passau arregallendi is lìburus de benibeniu a is pipius de Aristanis nàscius in su 2019.
Su lìburu “A fior di pelle” d’ant sceberau is bibliotecàrius in mesu a is propostas de su programma “Nati per leggere” sendi chi is bibliotecas ndi faint parti de tempus, sighendi e cumpartzendi totu is fainas po favoressi sa letura in famìllia a partiri de sa nàscida. Su progetu ‘Sa letura est unu donu’ cuncordau de is amministratzionis comunalis de Aristanis, Arborea e Zeddiani, de sa biblioteca de Aristanis e in collaboratzioni cun is pediatras e su Consultòriu familliari, tenit sa tarea de promovi sa letura in famìllia a cumentzai de sa nàscida de is pipius, ca funt medas is stùdius scientìficus chi ammostant cantu siat de importu donai a is pipius possibilidadis e ainas de svilupu intelletivu e emotivu fintzas de is primus annus de vida.
Sa letura est de seguru una de is prus atividadis profetosas e serbit meda po s’annèstriu ca agiudat is relatas intra de is pipius cun sa mamma, su babbu e is fradis e ca favoressit su svilupu de su linguàgiu e sa capacidadi de imparu. Custa bolit essi un’ocasioni formativa in prus aìnturu de sa famìllia ca ligendi is pipius ammanniant sa crosidadi e s’imbentu cun sa spera chi unu cras potzant essi citadinus abistus e cuscensiosus. Po su donu de su lìburu tocat a torrai gràtzias a sa Cooperativa Latte Arborea, a sa CRAI de is fradis Ibba e a su Club Service Soroptimist de Aristanis, chi ant acòlliu s’idea sustenendi su progetu.
Manuela Ennas
