Sàbudu su 27 de martzu aberit su servìtziu de test, de is chi donant resurtados in pagu tempus, ofertos de su sòtziu Lila de Casteddu. Ocannu a su progetu de preventzione de s’Hiv, s’Hcv e de sa Sifilide (connota in Sardigna cun su nòmene de male frantzesu) at tentu puru su contributu de Fundatzione de Sardigna. Is operadores voluntàrios ant a ofèrrere su test pro Hiv, Hcv e Sifilide a totu is chi ant a detzìdere de si aparagulare, tzerriende a su nùmeru de telèfonu 347 5565 300. Pro pòdere atzèdere a su servìtziu ofertu dae is voluntàrios Lila tocat a preguntare a su tzentralinu abertu su lunis de is 18 a is 21 e de su martis a sa chenàbura de is 18 a is 20. “Sa netzessidade de mantènnere is distàntzias s’at obrigadu, de su mese de làmpadas de s’annu passadu fintzas a immoe, a limitare e regulare s’atzessu a sa sede” comente at naradu Brunella Mocci, sa presidente de Lila Casteddu. “Is voluntàrios nostros ant organizadu su servìtziu e is locales pro donare garantzias a cantu prus personas de fàghere una test a indonu, anònimu e seguru fintzas in tempus de Covid, ca disinfetant de sighida totu is aposentos chi tenimus e impreant semper dispositivos sanitàrios de amparu”.
“S’esperièntzia de su 2020 est istada pro nois un’ ocasione pro s’allenare e at permìtidu de megiorare su servìtziu subra apuntamentu, respetende totu is mesuras de preventzione de su Covid-19. Totu is operadores voluntàrios de sa Lila sunt a disponimentu pro ascurtare is personas chi tenent bisòngiu e si nde pigare cura” at agiuntu Giacomo Dessì, su responsabile de su servìtziu de is test. Su servìtziu de custos test a resurtadu lestru est parte de su progetu “Test e so”, e in prus de su finantziamentu de Fundatzione de Sardigna dd’ant cuncordadu puru cun is contributos de su bandu annuale “Salude pùblica, meighina preventiva e riabilitativa” 2021.
Manuela Ennas