Est arribada sa de cuìndixi editzionis su “Fèstival Tuttestorie” de literardura po pipius e piciocheddus e ancora una borta Casteddu, de su bintunu a su binticincu de mesi de ladàmini, at a torrai a acolli, me is logus de “Sa Manifattura”, totu is amantiosus chi abetant custu atòbiu intra de is prus apretziaus de su setori.
S’argumentu po ocannu, chi is organizadoris iant sceberau de s’annu passau chena de sciri de totu is làcanas chi funt a òbbrigu po nexi de sa pandemia, est “Corpo a corpo. Racconti, visioni e libri dentro e fuori di me”. Unu tema chi parit intzetau in prenu e in su matessi tempus a scontroriadura chi pensaus a sa mancàntzia de corpus e a su depi abarrai atesu s’unu de s’àteru e duncas a s’abbisòngiu de depi torrai a arrexonai po cantu pertocat maneras noas de sperimentai po donai boxi a pipius, babbus e mammas, dotzentis, a is chi traballant in biblioteca o in is tzentrus educadoris e agatai aici, totus impari, una punna a meledai a pitzus de genias e formas dferentis chi su corpus podit tenni. Su Fèstival no si podit e pruschetotu no si bollit firmai e duncas tocat torrau a cuncordai, sèmpiri arrispetendi is normas de seguresa anti-Covid, po sighiri s’àndala sua e assegurai ancora esperièntzias e cumpartzidura, po mori de ainas e trastus digitalis puru chi funt de agiudu po lompi candu no fait a s’atobiai faci po faci. Difatis ocannu no ant a essi totu is pipius de scola chi ant a podi liai parti a is atòbius ma su Fèstival at a intrai in scola gràtzias a sa tecnologia e a cullegamentus vìdeu. In su programma atòbius e laboratòrius cun scritoris, fumetistas, artistas, atoris, musicistas, balladoris, scientziaus e giornalistas.
Tuttestorie est una manifestatzioni chi est crèscia de annu in annu gràtzias a s’incuru de chini custu fèstival dd’at imbentau e ddu portat a innantis sèmpiri cun passioni manna, est a nai Cristina Fiori, Manuela Fiori e Claudia Urgu de sa Libreria po piciocheddus Tuttestorie, cun sa collaboratzioni de su scritori Bruno Tognolini, chi est su Presidenti onoràriu.
Su Fèstival Tuttestorie nascit comenti a un’evolutzioni naturali de unu traballu sighiu po annus meda e de una collaboratzioni fitiana fata cun bibliotecas provintzialis, scolas, maistus, famìlias. Totu po circai de promovi sa ligidura e s’amori po is lìburus a dònnia edadi e mescamenti in is pipius piticus. In prus ocannu in mesu a totu is atividadis (sighendi custu ligàmini fait a ddas averiguai http://www.tuttestorie.it/festival/) su 23 de mesi de ladàmini su Fèstival pigat parti a is afestamentus po su centenàriu de sa nàscida de Gianni Rodari, unu giganti de sa literadura po sa pipiesa e po is mannus puru.
Manuela Ennas
