Didàtica a distàntzia. Unu disafiu pro afrontare s’emergèntzia

In custu tempus de apretu sanitàriu, s’est pedende un’isfortzu mannu de innovatzione a su mundu de s’iscola, cun su remenu de is dotzentes e de is famìlias in sa didàtica a distàntzia. A capitalizare su chi siamus imparende dae custa crisi diat èssere de importu pro su benidore, ma pro ddu fàghere bisòngiat de una bisione abbizòsica, naramus bistilonga, capassa de propassare custa circunstàntzia. In custu apretu natzionale acapiadu a sa spainadura de su Covid-19, is tecnologias ant mustradu de èssere de repente un’àncura de sarvesa – permitende, pro esempru, de giùghere a dae in antis in manera smart working fainas chi asinuncas si diant èssere firmadas – ma ant fintzas postu in evidèntzia is contradditziones, is fartas e is mancàntzias (tecnològicas e de cumpetèntzias), arrischende de annoditare distàntzias sotziales chi esistint giai, si no inderetura de nde ingendrare àteras noas.

In custu iscenàriu, su mundu de s’iscola est istadu de repente scabuladu, dae una die a s’àtera, podimus nàrrere, in sa realidade de sa didàtica a distàntzia (sa Dad). E paris cun s’iscola is famìlias. Segundu cantu istabilidu dae su Dpcm de su 8 martzu 2020, is dirigentes iscolàsticos “ativant, pro totu sa durada de sa tasida de is fainas didàticas in is iscolas, modalidades de didàtica a distàntzia”. S’Osservatòriu Iscola a distàntzia, cuncordadu dae su giassu Skuola.net, at publicadu dae pagu un’istùdiu tenende contu de su parre de ultres 30 mìgia istudiantes de iscolas segundàrias e de prus de 2 mìgia intra de babbos e mammas, e diant èssere 7 subra 10 is babbos e mammas chi ogni die agiudant is fizos in su smart learning, est a nàrrere aprendimentu disgagiadu, in su matessi tempus chi issos etotu sunt traballende in smart working.

B’at nointames unu problema mannu de digital divide, est a nàrrere unu divàriu mannu intra de chie tenet sa possibilidade de impreare is tecnologias e chie nde abarrat esclùdidu, ca famìlias medas non tenent in domo lìnias internet in gradu de suportare is letziones in is prataformas didàticas. Nde essit a pillu fintzas sa diferèntzia intra de nord e sud, mescamente pro su chi pertocat is trastos impreados. In is classes de su Nord is iscolas ant sc eberadu prataformas prus a s’avanguardia e ultres su 51 pro centu de is istudiantes leat parte cun regularidade a is vìdeu-letziones chi is dotzentes faghent in direta, comente chi esserent in classe. In sas regiones de su Sud, imbetzes, a is istudiantes benint pro su prus assignados còmpitos de cumprire e de currègere in lìnia.

Su Miur at prevìdidu unu contributu de 8,2 milliones de èuros pro afortigare sa didàtica a distàntzia pro mèdiu de sa figura de s’animadore digitale (unu contributu de milli èuros pro ogni iscola de impreare pro sa formatzione de is dotzentes, fintzas in lìnia, subra is modalidades didàticas innovativas), chi andant a s’aciùnghere a is 85 milliones giai prevìdidos dae su Decretu “Cura Itàlia” pro su refortzu de sa didàtica a distàntzia e de is fainas digitales in is iscolas italianas (70 milliones pro comporare trastos de dare in impreu a is istudiantes chi nde tenent bisòngiu, 10 milliones pro frunire is iscolas de prataformas e de trastos digitales ùtiles pro sa Dad e 5 milliones de pònnere a fundu pro sa formatzione de is dotzentes cun sa tele-
didàtica).

Istantziamentos ùtiles de seguru in custa fase de apretu, ma tocat a bìdere chi ant a assegurare unu mìnimu de funtzionalidade pro cussas iscolas e cussos dotzentes chi ant cumintzadu dae pagu a tènnere una relata cun s’iscola digitale, depende pònnere in pare innovatzione, imparu, inclusione e fintzas isvilupu sotziale de sa comunidade. S’impreu de is tecnologias de seguru no at a surrogare mai su balore de s’iscola traditzionale, ma pròpiu in custa fase in ue totus amus cumprèndidu s’importu de sa sotzialidade e de is relatas, sa cosa de importu est chi si siat isperimentende, in manera aici isparghinada e cumpartzida, una possibilidade noa de progetare e batire a dae in antis s’istrutzione gràtzias a sa tecnologia. Est ladinu chi però sena una bisione, sena sa punna a sighire a adotare trastos e metodologias noas, at a èssere fàtzile meda torrare in dae segus, mentras a capitalizare custa crisi, sighende is inditos e is tretos, diat èssere de importu pro definire is pratigas bonas pro unu giambamentu progressivu.

Totu custu non faghet a ddu fàghere a solos; s’isfortzu pro mantènnere su cuntatu cun is dischentes podet èssere individuale, ma su remenu a annoare su sistema iscolàsticu depet arribbare dae is istitutziones, ca s’innovatzione est un’isfortzu colletivu e tocat a afortigare de presse su chi est istadu fatu fintzas a immoe.

(sighit…)

Manuela Ennas

Diventa anche tu sostenitore di SardiniaPost.it

Care lettrici e cari lettori,
Sardinia Post è sempre stato un giornale gratuito. E lo sarà anche in futuro. Non smetteremo di raccontare quello che gli altri non dicono e non scrivono. E lo faremo sempre sette giorni su sette, nella maniera più accurata possibile. Oggi più che mai il vostro supporto è prezioso per garantire un giornalismo di qualità, di inchiesta e di denuncia. Un giornalismo libero da censure.

Per ricevere gli aggiornamenti di Sardiniapost nella tua casella di posta inserisci la tua e-mail nel box qui sotto:

Related Posts
Total
0
Share