A pustis de deghe annos de ausèntzia, Marcello Murru, cantadore originàriu de Arbatassa, chi perou istat in Roma de meda, torrat in s’iscena musicale cun unu discu de inèditos intituladu “Diavoli storti”, prodùsiu de sa Rea/Concerto Music, eticheta bolognesa chi in passadu at pubbricadu discos de Paolo Conte, Vinicio Capossela, Francesco Guccini e àteros.
Una regorta de noe cantzones de atomosfera unu pagu iscurigosa e ìntima. Un’istile su de Murru a metade intre su teatru e sa cantzone de autore, una boghe profunda e casi marigosa, sentidos chi ischint contare de is dificurtades de bìvere a die de oe, totu caraterìsticas chi nos faghent pensare a artistas comente Waits, Cohen, Conte. “Diavoli storti” dd’at cuncordadu gràtzias a unu crowdfunding, naramus una regorta cumpartzida, promòvida de sa regista Francesca Comencini e de s’iscritore Giancarlo De Cataldo, paris cun una truma de giornalistas, iscritores, mùsicos, fotògrafos, e amigos de Murru de una vida. Murru est istadu in is annos Otanta su ghiterreri ide is Mondorhama paris cun Liliana Ritteri e Varo Venturi, una truma famada intra de is amentiosos de su gènere Electro pop. Est artista dìligu e cautelosu e no at mai chèrfidu contare is resones chi dd’ant portadu a lassare s’iscena pro totu custu tempus, ma “pro fàghere custu traballu -at semper naradu – nche bolet fortza e balia e tocat de èssere in salude”.
Immoe custa torrada dda depimus mescamente a Francesca Comencini e a “Testaccio”, una cantzone iscrita bintighimbe annos faghet, chi sa regista at seberadu pro sa pellìcula sua “Amori che non sanno stare al gioco”. Fintzas sa regia de su vìdeu de “Diavoli storti” est a incuru de sa regista. Pustis de custa esperièntzia Marcello Murru est torradu a sonare in su palcu de s’auditorium de su Parcu de sa mùsica pro unu progetu de Giancarlo De Cataldo dedicadu a Leonard Cohen. E aici su gèniu suo si nd’est ischidadu de su sonnu de s’ierru. S’ispera est chi sa pandemia ddi permitat luego de promòvere s’album, ca est cuncordende unu tour de cuntzertos , in Sardigna puru, pro ddu fàghere connòschere e apretziare.
Manuela Ennas
