Dì Mundiali de s’Ambienti 2020

Su 5 de làmpadas de su 2020 lompit is annus sa Dì Mundiali de s’Ambienti, istituida de s’Assemblea Generali de is Natzionis Unidas su 15 de mesi de Idas de su 1972 cun sa Risolutzioni 2994 chi cumbidàt is guvernus e is organizatzionis internatzionalis a apariciai fainas e atzionis de profetu po s’amparu de s’ambienti. Su tema chi ant sceberau po custa editzioni de sa Dì Mundiali de s’Ambienti, arribbada in custu tempus de emergèntzia po nexi de su Covid-19, pertocat s’arrispetu de su mundu naturali po s’ammentai chi sa crisi e is dificurtadis de sa biodiversidadi funt unu pensamentu apretosu po s’esistèntzia de s’òmini in sa Terra.

Sa tarea de s’istitutzioni de sa Dì Mundiali de s’Ambienti fiat sa de arregordai sa primu Cunferèntzia de is Natzionis Unidas dedicada a s’ambienti chi iant cuncordau in sa tzitadi de Stoccolma de su 5 a su 16 de làmpadas in su 1972, candu iant sutiscritu sa Declaratzioni de Stoccolma cun 26 princìpius apitzus de is diritus e is responsabilidades de s’òmini in relata cun s’ambienti.

Cada annu s’organitzazioni sceberat unu argumentu printzipali e unu paisu stràngiu innui s’acumprint is eventus ufitzialis e prus de importu: ocannu tocat a sa Colòmbia a arrapresentai custa editzioni dedicada a sa biodiversidadi, mancai ddoi siat atentu mannu a àterus duus argumentus de fundamentu po sa salvaguàrdia de s’ambienti, est a nai s’incuinamentu atmosfèricu e is mudaduras de su clima. Oi, po unu totali de 8,7 millionis de genia de èssiris viventis, giai unu millioni est arrischendi de si sperdi po curpa de su degradu e su derruimentu de su logu innui bivint. Cun su dìciu chi acumpàngiat s’editzioni 2020 “It’s time for Nature”, immoi est su mamentu po su mundu naturali, si bollit ponni a s’atentu de totus e in totu su globu sa tutela de is formas diferentis, animalis e vegetalis, chi cumponint is ecosistemas de su Pianeta. In custu arrexonu si cunfirmat apretosu s’abbisòngiu de unu cambiamentu de àndala de s’economia, a manera chi tèngiat sèmpri contu de s’ecologia.

Giai in su mesi de abrili, in mesu a s’apretu Coronavirus, su Segretàriu Generali de s’ONU António Guterres iat declarau chi nc’at abbisòngiu de imbentai traballus nous e fainas econòmicas passendi po una transidura limpia e birdi e chi su dinari de is cuntribuentis iat a depi essi impreau po sarvai fainas econòmicas po un’idei de crèscida sostenibili, colendi de un’economia murra a una birdi e p ondi pesai una sotziedadi cun personas prus resilientis.

Manuela Ennas

Diventa anche tu sostenitore di SardiniaPost.it

Care lettrici e cari lettori,
Sardinia Post è sempre stato un giornale gratuito. E lo sarà anche in futuro. Non smetteremo di raccontare quello che gli altri non dicono e non scrivono. E lo faremo sempre sette giorni su sette, nella maniera più accurata possibile. Oggi più che mai il vostro supporto è prezioso per garantire un giornalismo di qualità, di inchiesta e di denuncia. Un giornalismo libero da censure.

Per ricevere gli aggiornamenti di Sardiniapost nella tua casella di posta inserisci la tua e-mail nel box qui sotto:

Related Posts
Total
0
Share