Culurgionis de Ollastra Igp. Est nàsciu su Cunsòrtziu de tutela

A pustis de cuàturu annus de s’arreconnoscimentu de s’ìndicu geogràficu amparau (Igp) me is diis passadas est nàsciu in Tortolì su Cunsòrtziu de Tutela de is Culurgionis de Ollastra Igp gràtzias a s’aficu de una truma de produtoris, cun sa tarea de giai amparu, promòviri e avalorarai una spetzialidadi locali connota e apretziada oramai in totu su mundu. Is assòtzius fundadoris de su Cunsòrtziu funt su “Laboratorio di pasta fresca” de Richard Marci de Cardedu, “Cospat soc.coop” de Irbonu, “Italagourmet srls” de Tertenia, sa “Ditta Pastificio Sapori di Sardegna” de Tiziana Loi de Loceri, “Muceli&Lottu snc” de Iersu e “I Sapori di Ogliastra” de Vito Arra de Lanusè.

Custas aziendas in su 2019 ant prodùsiu sa bellesa de 254.000 chillus de culurgionis cun marcu Igp. Su Cunsòrtziu s’agatat in is localis de sa Cna de s’Ollastra, in sa zona industriali Baccasara a Tortolì, assòtziu chi at agiudau meda in s’iter po otenni su marcu Igp e fintzas a donai vida a su Cunsòrtziu etotu. Ma custu est sceti s’inghitzu ca immoi cumentzat diaderus sa parti prus difìtzili, est a nai sa de amparai sa prus pasta famada ollastrina po garantiri sa calidadi e averiguai puru is tentas de imitatzioni chi arriscant de fait dannu.

Su Consòrtziu punnat puru a promòviri e difundi impari a is culurgionis su nòmini e is scusòrgius de s’Ollastra e duncas de sa Sardìnnia in totu su mundu. Su presidenti de su Cunsòrtziu Vittorio Arra at cumbidau totu is produtoris a ddoi liai parti sèmpiri arrispetendi is arrègulas chi prevedit su sistema de averiguamentu de su protzessu produtivu, ca sa voluntadi est sa de ammanniai sa retza de totu is chi traballant a ingìriu de custa richesa faendi contu de sa traditzioni po sighiri a dda portai a innantis in su benidori.

In sa traditzioni is culurgionis fiant unu mandiari de is diis de festa, pruschetotu in atòngiu e in ierru, e fiat unu lussu ca su papai de dònnia dì fiat prus simpli e prus pòberu. In prus de una bidda de s’Ollastra sa noti de is Animeddas is fèminas de domu lassant unu pratu de culurgionis po onorai sa memòria de is ànimas e sèmpiri po is ànimas a dì infatu, sa de is mortus, ddus oferint a totu su bixinau comenti siant una prenda o faint un’allemùsina a intentzioni de is mortus.

Nc’at prus de una bidei de comenti siat nàscia custa pasta e sa dibata a pitzus de s’etimologia est ancora aberta. Teneus tsestimònias scritas de is primus annus de s’Otuxentus chi fueddant de culurgionis ma sa manera de ddus fai no est mudada in su tempus, mancari dònnia bidda tèngiat sa ritzeta e is aciuntas suas.

Po fai is culurgionis tocat a ponni asuba de un’arrogu tundu de pasta unu prenimentu de patata, casu e fragu bellu de menta e a ddu serrai, spitzulendi cun is didus is alas, a “spighita”: s’arresurtau est una pasta cumprida a forma de gùtia chi parit arricamada. Sa spera est chi custu Cunsòrtziu siat de esèmpiu po àterus prodotus puru de Sardìnnia ca a is produtoris ollastrinus ddis fait onori a essi arrennèscius a si ponni impari po su profetu de unu beni chi est de totus.

Manuela Ennas

Diventa anche tu sostenitore di SardiniaPost.it

Care lettrici e cari lettori,
Sardinia Post è sempre stato un giornale gratuito. E lo sarà anche in futuro. Non smetteremo di raccontare quello che gli altri non dicono e non scrivono. E lo faremo sempre sette giorni su sette, nella maniera più accurata possibile. Oggi più che mai il vostro supporto è prezioso per garantire un giornalismo di qualità, di inchiesta e di denuncia. Un giornalismo libero da censure.

Per ricevere gli aggiornamenti di Sardiniapost nella tua casella di posta inserisci la tua e-mail nel box qui sotto:

Related Posts
Total
0
Share