Coronavirus e famìllia. Funt is fèminas a traballai de prus

Apu fueddau in s’ùrtimu artìculu de custa rubrica de su sinnificau de su fueddu smart working e de cantu a bortas bèngiat impreau in manera pagu adata po inditai unu traballu fatu de remoto, duncas atesu de sa sedi printzipali, chi invècias iat a essi mellus a definiri telelavoro. Comenti si siat, custus cuntzetus ant impostu tempus, modus e logus nous po sa majoria de is traballadoris, ma a cantu parit is arresurtaus de custu esperimentu funt diferentis intra de òminis e fèminas. Si est berus chi de una parti custa manera de traballai at ammostau de podi serbiri po una chistioni de paridadi de generi, a s’àtera parti in custa fasi de emergèntzia est bessendi a pillu chi funt is fèminas a ndi sunfriri de prus. Ma tocat a biri poita. Custa manera de traballai abbisòngiat de una disciplina, de arrègulas e oràrius cumpartzius cun s’azienda e is cullegas, de unu logu atretzau innui abarrai sulenus e chena de strobbu, totus aspetus chi no est fàtzili a ponni impari in una domu e in in mesu a una famìllia, pruschetotu in custu mamentu ca tocat a ddoi stai a marolla.

A cantu narant is stùdius chi pertocant s’impreu de su traballu de remoto perou is fèminas si funt chesciendi poita ca funt traballendi meda de prus. Una fèmina dònnia tres (contras a un’òmini dònnia cincu) no arrennèsciit prus, o ddu fait cun pelea, a tenni un’echilìbriu intra traballu e fainas de domu. Totu custu poita ca sa responsabilidade de sa cura de sa famìllia sighit a essi in ponti a is fèminas e tocat a issas portai a innantis is cosas fitianas de sa famìllia e circai de arresolvi is dificurtadis chi si funt aciuntas cun su Coronavirus. Duncas custu traballu chi iat a depi essi disgagiau e lestru a bortas est prus difìtzili de ponni in pràtiga ca is fèminas si depint partziri po allichidiri sa domu, coxinai, sciacuai e prentzai s’arroba, e in prus sighiri is fillus in custa manera noa de didàtica fata a distàntzia po mori de prataformas digitalis chi permitint de liai parti a is letzionis immoi chi is scolas e s’universidadi funt serradas.

Torrendi a su stùdiu duncas is fèminas, mancai siant apretziendi sa lìnia innovativa de su traballai aici, contant de s’intendi pagu adecuadas po atendi a totus is cosas impari, funt impensamentadas e sceti pagu bortas agatant su tempus po si spreviai, po s’istentai faendi sport e allebiai unu pagu custu tempus grai de crisi. Sa spera est chi movendi de cantu est acuntessendi immoi po nexi de su Coronavirus potzat essi de fundamentu po ndi pesai unu progetu sèriu de traballu in smart working chi tèngiat arrispetu de is abbisòngius de is fèminas chi traballant e chi ant sceberau de tenni una famìllia in logu de depi arrennuntziai a sa famìllia po tenni unu traballu.

Manuela Ennas

Diventa anche tu sostenitore di SardiniaPost.it

Care lettrici e cari lettori,
Sardinia Post è sempre stato un giornale gratuito. E lo sarà anche in futuro. Non smetteremo di raccontare quello che gli altri non dicono e non scrivono. E lo faremo sempre sette giorni su sette, nella maniera più accurata possibile. Oggi più che mai il vostro supporto è prezioso per garantire un giornalismo di qualità, di inchiesta e di denuncia. Un giornalismo libero da censure.

Per ricevere gli aggiornamenti di Sardiniapost nella tua casella di posta inserisci la tua e-mail nel box qui sotto:

Related Posts
Total
0
Share