A sa Regione Sardigna dd’ant nominada Autoridade de gestione pro su perìodu 2021-2027 de su programma Interreg Next Med, initziativa de importu finantziada de s’Unione europea, chi pertocat 15 Paisos, pro sa cooperatzione in s’àrea de su Mediterràneu. Sa Sardigna at lòmpidu 9 votos de is ùndighi de is rapresentantes de sa task force, naramus sa truma operativa incarrigada de cuncordare su programma, suberende sa cuncurrèntzia de sa Grètzia.
“Su chi est arribadu – at naradu su Presidente de sa Regione, Christian Solinas – est su reconnoschimentu de su rolu tzentrale chi s’ìsula nostra tenet in un’iscenàriu cun possibilidades mannas cara a un’isvilupu chi depet èssere sestadu respetende, cun unu sentidu de solidariedade, un’echilìbriu intra de totu is àreas. Unu bisòngiu chi intendimus ancora de prus oe in unu mamentu difìtzile pro s’economia globale, pro curpa de un’ apretu sanitàriu chi non si fiat mai bidu. Su sèberu de sa Sardigna comente a ghia de custu programma rapresentat un’atestadu de fidàntzia chi nos ant donadu sa Cummissione Ue e totu is Paisos chi bi leant parte, e ddis torramus gràtzias… Su nostru at a èssere unu remenu chi semus giai ponende in s’àrea de su Mediterràneu, cun sas àteras regiones insulares, in una prataforma de cooperatzione nàschida pro difendere dae in antis a is Istitutziones europeas is resones de cussos territòrios penalizados de una sèrie de disvantàgios geogràficos e istruturales chi fimant sa crèschida e s’isvilupu”.
Su programma Interreg Next Med est su de tres tziclos de s’initziativa de cooperatzione finantziada de s’Ue in s’àrea de su Mediterràneu, chi sa Cummissione europea at a presentare intro s’istiu de su 2021. Sa tarea est sa de arrennèschere a nde pesare tra is Paisos chi partetzipant – Algeria, Tzipru, Egitu, Frantza, Grètzia, Giordània, Israele, Itàlia, Lìbanu, Malta, Palestina, Portugallu, Ispagna, Tunisia e Turchia – un’acordu forte e sostenibile pro afrontare in manera cumpartzida is disafios comunos comente sa mancàntzia de traballu, de inclusione pro is giòvanos, de integratzione econòmica e is giambamentos de su clima.
Is Paisos chi pigant parte a a s’Interreg Next Med ant reconnotu a sa Regione Sardigna su balore de su traballu fatu in su gestire in manera professionale e funguda su Programma Eni Cbc Med, mustrende de tènnere a disponimentu esperièntzia, cumpetèntzias, trastos e abilesa pro sighire in custu tretu.
Manuela Ennas
