A pustis de su degòlliu de is fogus chi me is mesis passaus ant fertu su Montiferru e totu sa Sardìnnia su mundu de s’arti at detzìdiu de si donai de dai po agiudai sa genti de cussus logus a si torrai a strantaxai, cuncordendi una mustra de otanta òberas. Is artistas chi ant liau parti a custu progetu, no sceti sardus ma fintzas stràngius, ant arregallau is òberas insoru chi ant a abarrai in mustra a manera chi is bisitadoris ddas potzant apretziai e pruschetotu comporai a unu prètziu prus baratu de su chi ballint, faendi un’oferta. Su guadàngiu at a andai a su Comunu de Iscanu, una de is biddas chi at tentu is dannus prus mannus de su fogu, cun sa tarea de arrenesci a arrecuperai su patrimòniu ambientali de cussas zonas po mori de una faina cumpartzida chi ponit impari arti e bonucoru. Su de is artistas est unu sentidu craru, una testimònia de sa contrariedadi insoru a atzionis malas che custa. Sa de “Controfuoco” ddi podeus nai chi siat una forma de paradura artìstica, una pràtiga de agiudu chi is sardus funt bonus meda a fai.
Sa mustra“Controfuoco” dd’ant incingiada sàbadu 25, pròpiu in su mentris de is Diis Europeas de su Patrimòniu, in sa sala de is mustras temporàneas de su Museu de Gennamaria, in Biddanoa de Forru. Ddoi ant liau parti su crìticu Paolo Sirena, is rapresentantis tzivilis de Biddanoa de Forru e de Iscanu, cun is sindigus Maurizio Onnis e Antonio Flore, e una bella parti de is artistas. A t a fai a ddoi andai fintzas a domìnigu su 10 de ladàmini, in is matessis oràrius de abertura de su Museu archeològicu. Is òberas fait a ddas biri puru in is pàginas de is retzas sotzialis de sa mustra
Cunforma a cantu stabiliu de is arrègulas po firmai s’impestu de Covid.19, ddoi ant a podi intrai sceti is chi tenint sa certificatzioni birdi.
Manuela Ennas