Cales sunt is iscenàrios possìbiles a pustis de custus tempus de serrada determinada dae su Coronavirus? Tra is setores prus in dificurtade b’at de seguru cussu turìsticu chi, sende motore fintzas de àteros cumpartos de s’economia, est giai tenende dannu dae sa crisi in atu. Proamus a bìdere comente at a pòdere cambiare sa manera de biagiare in s’annu imbeniente. Su turismu est unu setore cun relatas cumplementares chi cumportat recadimentos dae deretu fintzas in àteros setores comente a trasportos, agèntzias de biàgiu, logos de acasàgiu, servìtzios culturales e cummertziales de sòlitu. Su Touring Club at contadu chi pro 100 èuros ispèndios de turistas italianos e istràngios in Itàlia, sa de tres parte est destinada a s’ospedàgiu, 13 èuros andant a is locandas pro mandigare, 12 èuros a su cummèrtziu, 7 euròs a su trasportu aèreu internu, 6 èuros a àteros mèdios de trasportu, 4 èuros a agèntzias de biàgiu, 3 èuros a servìtzios culturales, isportivos e de recreu, e 20 èuros a àteros servìtzios genèricos.
S’impatu de su turismu, duncas, pertocat custos setores de s’economia italiana chi, de cosseguèntzia, ant a tènnere dannu mannu dae sa crisi. Su perìodu prus favorèvole pro su turismu est cussu istadiale, dae làmpadas a austu, tempus chi cuntzentrat giai sa metade de is presèntzias annuales; nointames, istràngios medas incumentzant a frecuentare sa penìsula e is ìsulas giai dae maju, mese in ue de seguru no at a èssere possìbile torrare a sa normalidade. Un’istùdiu de s’agèntzia de informatzione Cerved est lòmpidu a supònnere duos iscenàrios possìbiles: in su primu, s’apretu pro s’emergèntzia durat finas a maju e colant duos meses in antis de torrare a sa normalidade; in su segundu, s’apretu si allonghiat finas a mese de nadale e colant ses meses in antis chi sa chistione potzat megiorare de a veras. In custos duos iscenàrios, su setore turìsticu diat a pèrdere su 30-35% de guadàngios in sa primu ipotesi o, peus, su 60- 70 per cento in sa segunda.
Sa crisi e is giambamentos chi su coronavirus est portende in su setore turìsticu, nointames, no ant a èssere econòmicos petzi, ma fintzas sotziales e culturales: su virus nos at a obrigare a torrare a pensare a su modu nostru de biagiare, de traballare in custu setore e de tènnere relatas cun is àteros e cun su mundu. De seguru is primas a torrare a partire ant a èssere is zonas chi tenent un’arriscu bàsciu de impestu e cun sistemas sanitàrios adecuados, prontos a respùndere deretu chi ddoe esserent incruaduras, e is turistas italianos, nessi in unu primu tempus, ant a dèpere seberare de istare in su paisu issoro, mancari in localidades prus pagu famadas e a sa moda, preferende unu turismu lenu, sena de presse e a s’àera aberta.
Si pensat chi is biàgios de còpia o de famìlia ant a partire cun prus lestresa rispetu a cussos in cambarada, mescamente a s’inghitzu, cando at a èssere netzessàriu mantènnere formas de distàntzia sotziale pro seguresa. In s’istiu 2020, su turismu at a èssere cun probabilidade manna prus pòberu e is vacàntzias curtzas, siat pro sa crisi econòmica siat pro su bisòngiu de traballare pro recuperare su tempus pèrdidu in custos meses de desacatu. Pro su chi pertocat sa Sardigna, sende chi is datos de s’impestu nos lassant tènnere ipsera pro su benidore, sa pandemia portat s’indùstria turìstica a torrare a pensare a sa destinatzione de s’ìsula e sa manera de dda promòvere.
Giai medas traballadores de custu setore sunt faghende progetos de turismu internu pro is sardos e pro acollire is turistas donende garàntzias pro sa salude. Is espertos però narant chi est ancora chitzi pro fàghere previsiones e tocat a isetare asumancu su mese de maju pro bìdere s’àndala de su virus. In antis sa salude duncas e a pustis is vacàntzias.
Manuela Ennas
