Su progetu Bestmedgrape, finantziau in su cuntestu de su programma de coperatzioni Eni Cbc Med, innui sa Regioni Sardìnnia tenit s’Autoridadi de Gestioni, e ghiau de s’Universidadi de is Stùdius de Casteddu, punnat a torrai a impreai is arrefudus de sa traballadura e indurcadura de s’àxina po prodùsiri prodotus po sa cura de bellesa e fintzas po sa saludi.
Funt cincu is Paisus de s’àrea Èuru-Mediterrànea chi liant parti a su progetu: Itàlia, Tunisia, Frantza, Lìbanu e Giordània. Sa primu fasi de progetu fiat inghitzada in su mesi de cabudanni de su 2019; sa segunda in atòngiu passau, cun is primus laboratòrius, e sa de tres iat a depi acabbai in su mesi de austu de su 2022, cun unu investimentu de 3,3 millionis de èurus. Is ùrtimus stùdius scientìficus ammostant chi s’àxina est una frùtora arrica de polifenolus capassus de amparai s’organìsimu e cun calidadis profetosas po curai maladias tumoralis, infiammatòrias e batèricas.
Bestmedgrape nascit de una pensada po promovi sa sustenibiliadi cun sa punna de no sperdi totu su chi abarrat de sa binnenna e antzis de ddu fai frutai. Difatis, po mori de is nanutecnologias, de is arrefudus de s’àxina (cambus, croxu, pisu) ndi bogant is partis nòbilis e ddas mudant in elementus bio-ativus, netzessàrius po prodùsiri integratoris alimentaris e prodotus po sa bellesa. Is arrefudus ddus scerant e ddus traballant in sa “Banca de su Germoplasma” in s’Universidadi de Casteddu innui, in prus, averiguant comenti is matas crescint e comenti arrespundint a is dificurtadis de s’ambienti e de su tempus metereològicu.
Su protzessu de bogadura de is componentis chìmicus ddu faint gràtzias a is “living labs”, naraus atividadis innovativas de circa, chi cuncordat su Crea, Tzentru servìtzius po s’innovatzioni e s’imprenditorialidadi de s’Ateneu de Casteddu cun su Cnr de Tàtari. Su progetu tenit puru sa tarea de favoressi sa nàscida de start-up, est a nai impresas noas, in su setori de su binu, e formas de fainas cumpartzidas cun siendas chi traballant giai in is territòrius. In Sardìnnia, po immoi, ddoi pigant parti sa Icnoderm, is Cantine Argiolas e s’Istitutu tènnicu Ottone Bacaredda de Casteddu.
Manuela Ennas