In su 2016 Steve Hackett e is Djabe aiant coladu carchi die in Sardigna e mescamente in Anglona e in sa seu romànica de Nostra Sennora de Tergu, cuncordende un’istùdiu in sa domo de s’arretore. In cue aiant produidu unos cantos de materiales noos chi posca Tamas Barabas, in fase de produtzione, at postu in pare a sa mègius, dende vida a s’album ‘Life is a journey – The Sardinia tapes’. Pro avalorare cussu traballu dd’ant portadu in giru in logos medas e ant publicadu fintzas unu de is cuntzertos. In su 2019 is Djabe detzìdint de torrare in cussos logos ispantoso de Sardigna pro arregistrare àteras sessiones musicales tra su 7 e su 10 de trìulas. Steve Hackett, invècias at intregadu is partes suas pustis de ddas àere arregistradas de su 29 e su 30 trìulas in Budapest.
Alloddu, est nàschidu gasi su discu nou ‘Back to Sardinia’. Is chi ant sighidu me is annos sa collaboratzione intra de su chitarrista inglesu e sa banda ungheresa ischint giai chi tocat a isetare una proposta musicale chena de làcanas e cun ammesturos de gèneres diferentes. Podimus nàrrere chi, pro su chi pertocat s’istile, ddoe at una continuidade perfeta cunfrontu a sa primu esperièntzia. Faghet a ddoe intèndere un’àera sulena e adasiosa e fintzas is sonos presentant custas caraterìsticas. Is tonos sunt prus lèbios respetu a su passadu, cun unu sentidu prus melodiosu. Su discu est longu, lompet is otanta minutos, ma curret bastante bene e a lestru sena istracare mai.
Luego etotu nos acollit una sonoridade elegante tra world music, jazz e prog, cun sonos delicados, gràtzias fintzas a impastos eletroacùsticos chi giai connoschimus in sa mùsica insoru. Andende a dae in antis agatamus cumpositziones in ue nde sartat a foras cussa libertade chi nde benit dae s’improvisatzione ma is mùsicos mustrant s’abilidade insoru e sa capatzidade de si ischire mòvere in prus orientamentos istilìsticos sena pèrdere cumpatesa in su traballu.
E si nos paret de intèndere ecos de su Pat Metheny Group in versione prus melodica in ‘Girl in the Palau Woods’, o arretumbos de bolero casi de discendèntzia Zappiana in ‘Dancing in a jar’ e sabores latinos in ‘Flying kites’, su chi nos lassat ispantaods est chi is calidades de Hackett non parent bènnere prus pagu cun s’edade, e antzis est in prus de una ocasione, protagonista assolutu cun mamentos solìsticos chi nde leant su sulidu, in cussu istile bene connotu ma chi àncora ischit giare emotziones gràtzias a gustu, timbru e abilesas tècnicas.
S’album ddu serrat ‘Floating boat’, unu branu de sa sessione de su 2016, ma chi s’insertat bene in su cuntestu nou. ‘Back to Sardinia’ assegurat minutos de ascurtu a beru galanu e testimòngiat de comente sa cungrega intra de Hackett e is Djabe sigat cun profetu donende a custas personalidades fortes de sa mùsica sa manera de cunfrontare is esperièntzias insoru e arragalende a is amantiosos arresurtados nòdidos. Comente a pro sa primu publicatzione, cun su Cd est essidu puru unu Dvd, cun is versiones stèreu e surround de s’album, ma fintzas cun materiales vìdeu in prus.
Ddoe at unu filmadu in S8 chi mustrat logos meravizos de sa Sardigna, alternados a mamentos de traballu e mamentos de pàsiu de is musicistas. Posca faghet a bìdere duos cantos, ‘In that quiet Earth’ e ‘Castelsardo at night’, arregistrados a su Tzìrculu Jazz de Budapèst in su 2019 e un’àteru, ‘Turtle trek’, pigadu de un’esibitzione a su Momkult, semper a Budapèst, in su 2018. A s’acabbu faghet a iscurtare un’intervista radiofònica in ue Hackett contat s’esperièntzia sua in contu de “Life is a journey – The Sardinia tapes” cu paràulas de istima pro s’ìsula nostra.
Manuela Ennas
