Assandira a su Fèstival internatzionale de su tzìnema de Venètzia

Su regista de Durgali Salvatore Mereu, chi in passadu aiat giai leadu parte a su Fèstival internatzionale de su tzìnema de Venètzia cun Ballo a tre passi, Tajabone, Bellas Mariposas e cun su progetu collètivu Venezia 70 – Future Reloaded, ocannu ddoe at a torrare pro sa de chimbe bortas cun s’ùrtima pellìcula sua Assandira, mancari foras de su cuncursu ufitziale de sa de 77 editziones.

A Mereu no est sa primu borta chi pro is traballos suos ddi benit su meledu de unu libru e pro Assandira dd’at donadu ispiratzione s’istòria contada de s’antropòlogu Giulio Angioni in su libru chi portat su matessi nùmene. Naramus puru chi s’òpera, produida de sa sotziedade VIACOLVENTO e de Rai Tzìnema, tenet una raighina literària forte e cun sa literadura est totu un’intritzu ca nd’est protagonista Gavino Ledda, autore de su romanzu famadu “Padre padrone” postu in iscena pro su tzìnema de is frades Taviani in su 1977 e premiadu cun sa Prama de Oro in su Fèstival de Cannes. In sa pellìcula de Mereu, Gavino Ledda est Costantinu, unu pastore a dae in antis cun is annos chi no est arrennèschidu a sarvare a su fillu Mario de su fogu chi at brusiadu s’agriturismu Assandira e su padente totu in cue a inghìriu.

Mario fiat unu disterrau torradu de sa Germània in pare a sa mullere Grete cun s’idei de nde pesare un’agriturismu in logu de su cuile de su babbu pro ofèrrere a is stràngios un’esperièntzia de vida in su mundu pastorale e traditzionale sardu. In sa pellìcula Mereu intrat in su dolore e in su disisperu de Costantinu, ca si ghetat neghe pro cantu est acontèssidu, e nos contat su surrùngiu e s’impudu pro custa malasorte chi dd’at privadu de totu, comente chi totinduna si siat furriada contras pro ddi torrare un’isgarru.

Forsis pro curpa de àere profanadu cussu logu, de non dd’àere tentu arrespetu e àere chircadu de torrare a fàghere bìvere unu passadu chi non podet istare a marolla in pare a unu giambamentu gasi mannu? Cantu fatu de Mereu diat pòdere pàrrere in onore a sa terra nostra, stratallada a bias de cussu turismu chi non tenet contu de su sentidu fungudu de is logos, de sa gente e de s’istòria, in cussa dibata semper aberta intra de traditzione e modernidadi.

E comente semper pro cumprèndere is tempos de como tocat a cumprèndere su tempus passadu sighende is arrastos bonos e lassende a un’ala is malos. E aici Mereu sighende su tretu inditadu de Angioni nos faghet una fotografia de custa Sardigna chi punnat a èssere àteru, mancari pro fàghere cumpraghèntzia a is furesteris, ma chena de ischire ancora chie est de a veras.

Manuela Ennas

Diventa anche tu sostenitore di SardiniaPost.it

Care lettrici e cari lettori,
Sardinia Post è sempre stato un giornale gratuito. E lo sarà anche in futuro. Non smetteremo di raccontare quello che gli altri non dicono e non scrivono. E lo faremo sempre sette giorni su sette, nella maniera più accurata possibile. Oggi più che mai il vostro supporto è prezioso per garantire un giornalismo di qualità, di inchiesta e di denuncia. Un giornalismo libero da censure.

Per ricevere gli aggiornamenti di Sardiniapost nella tua casella di posta inserisci la tua e-mail nel box qui sotto:

Related Posts
Total
0
Share