Dònnia primu acabbu de cida de cabudanni in sa bidda de Crabas tzèlebrant a Santu Srabadori cun una festa religiosa e tzìvili tra is prus apretziadas de sa zona de Aristanis. Ocannu perou, po nexi de is acumprimentus tènnicus acapiaus a s’apretu Covid-19, e tenendi contu de sa crèscida manna de s’impestu in s’ìsula me is ùrtimas diis, is fedelis no ant podi liai parti a sa prucessioni chi arregordat un’acadessimentu de su 1619.
In cussu tempus a is abitantis de sa penìsula de su Sinis fatu-fatu ddis tocàt a s’amparai de is bardanas de is Morus chi lompiant de mari po torrobai su logu, e una borta, in mesu a s’avalotu, aici narat su contu, una truma de crabarissus iat portau a coddu, currendi de Crabas a su burgu de Santu Srabadori, sa stàtua de su santu po dda ponni in sarbu. A cantu contat sa paristòria is crabarissus no si fiant cratzaus ma si fiant postus nais asuta de pei po ndi pesai prus prùniu currendi e fai crei aici a is Morus de essi medas de prus. Cussa trassa fiat stètia profetosa ca is Saracenus, timendi de s’agatai ananti un’esèrcitu tropu mannu, si nci fiant fuius a lestru.De insaras, dònnia annu, si torrat a arrepiti custa tzelebratzioni, famada pruschetotu po is curridoris scrutzus chi currint po seti chilometrus, est a nai su tanti po lompi de Crabas a Santu Srabadori, innui s’agatat sa cresiedda dedicada a su santu.
Custu burgu, famau fintzas ca me is annus Sessanta dd’iant impreau po ddoi girai pellìculas western, torrat a bivi pròpiu po cuncordai sa festa e po sciolli su votu in ammentu de cussu miràculu e acollit stràngius e fidelis de totu sa Sardìnnia. Sa traditzioni bollit chi sa stàtua abarrit in Crabas fintzas a su sàbudu a mengianu in antis de su primu domìnigu de cabudanni candu centenas de giòvanus a bistimenta bianca acapiada in chintzu a triciajoba, comenti sa de is penitentis, currint scrutzus in mesu a perdas e prùniu portendi a coddu su simulacru fintzas a lompi a sa cresiedda de su burgu. Inguni sa stàtua ddoi abarrat fintzas a su meigama de su domìnigu candu is matessis curridoris dda torrant a portai a domu, in sa crèsia de Santa Maria Assunta de Crabas. Ocannu su ritu at a essi sceti religiosu ca a curri cun is mascareddas in buca e abarrendi atesu s’unu de s’àteru est cosa difìtzili chi nd’iat a liai totu s’alentu de custa traditzioni. In prus iat a essi pagu arrispetosu puru a proibiri a sa genti de liai parti mancai a oru de su tretu de sa processioni. Po custa arrexonis is organizadoris ant detzìdiu de annuddai sa cursa. A dolu mannu.
Manuela Ennas
